Шэраг праваабарончых рэсурсаў са спасылкай на ініцыятыву “Хрысціянская візія” падаюць інфармацыю пра затрыманне жыхара Гомеля Андрэя Пуканава. У паведамленні гаворыцца пра тое, што 18 студзеня, пасля правядзення ператрусаў на працоўным месцы і па адрасе пражывання, гамяльчук быў затрыманы.
Андрэй Пуканаў — настаўнік нямецкай мовы і бакалаўр багаслоўя, праваслаўны вернік. Аднак знаёмыя затрыманага ведаюць яго таксама як краязнаўцу, члена Беларускага геаграфічнага таварыства, настаўніка. У 1990-я гады ён быў сябрам краязнаўчай арганізацыі “Талака”, распрацоўваў аўтарскія курсы па геаграфіі для філіі Коласаўскага ліцэя ў Гомелі. Пазней займаўся грамадскай дзейнасцю, спрабаваў балатавацца ў Палату прадстаўнікоў.
На дадзены момант актуальнае месцазнаходжанне Андрэя Пуканава невядома. “Штодзень” будзе сачыць за сітуацыяй.
