На аўтазапраўцы “Беларуснафты” ў Яроміна, што пад Гомелем, пачаў працу першы ў краіне робатызаваны гандлёвы модуль. Комплекс пад назвай “Цікавік” цалкам аўтаматызуе працэс пакупкі — ад прыёму заказу да выдачы тавару, паведамляе прэс-служба “Беларуснафты”.
У асартыменце — сотні пазіцый, у тым ліку напоі, закускі і аўтамабільныя тавары. Праект рэалізаваны сумесна з кампаніяй “ІдэйРобатыксТрэйд” пры ўдзеле ўпраўлення лічбавізацыі.
Распрацоўка заняла каля года: пад працу робата адаптавалі стандартны павільён і стварылі асобныя кліенцкую і тэхнічную зоны.
Зараз модуль працуе ў кругласутачным рэжыме і праходзіць тэставанне. Калі тэхналогія пакажа сваю эфектыўнасць, такія комплексы могуць з’явіцца і на іншых АЗС “Беларуснафты”.