Гомельская журналістка і былая палітзняволеная Ларыса Шчыракова запрашае на фотасесіі ў беларускім традыцыйным адзенні ў Беластоку. Яна таксама звярнулася да сяброў і падпісчыкаў з просьбай дапамагчы пашырыць інфармацыю пра яе этнафотапраект.
“Вельмі хачу мець больш ахвотных сфатаграфавацца ў традыцыйным адзенні”, — напісала Шчыракова.
На здымкі можна прыйсці аднаму, удваіх або ўсёй сям’ёй. Двухгадзінны фотасэт прадугледжвае два-тры вобразы. Здымацца прапануюць у Падляскім музеі народнай культуры, парках і маляўнічых мясцінах Беластока ды ваколіц. Па жаданні можна арганізаваць фотасесію ў студыі.
Не толькі фота, але і знаёмства са строем
Для ўдзельнікаў Шчыракова падбірае сарочкі, андаракі, фартухі, гарсэты, паясы і галаўныя ўборы са сваёй прыватнай калекцыі. Паводле аўтаркі праекта, значная частка адзення — арыгінальныя старадаўнія рэчы з Гомельшчыны і Берасцейшчыны. Вобразы дапаўняюць упрыгожванні, ручнікі, посцілкі, кошыкі ды іншыя этнаграфічныя прадметы.
Падчас сустрэчы Ларыса расказвае пра беларускі традыцыйны строй і прапануе вывучыць некалькі простых народных танцаў — каб атрымаць больш жывых і натуральных кадраў.
Кошт фотасэта — 200 злотых. Паводле абвесткі, удзельнікі атрымаюць каля ста фатаграфій з колеракарэкцыяй праз два дні. Запісацца можна праз асабістыя паведамленні ў Instagram.
Сарочка ад Святланы Алексіевіч
Раней у гутарцы са “Штоднём” Шчыракова расказвала пра аднаўленне этнафотасесій у Беластоку. У эміграцыю яна змагла забраць аўтэнтычнае адзенне і ручнікі са сваёй калекцыі.
У ліпені 2026 года журналістка падзялілася гісторыяй падтрымкі ад Святланы Алексіевіч. Даведаўшыся пра этнафотапраект, нобелеўская лаўрэатка дала ёй сто еўра на набыццё старадаўняй сарочкі.
“Купіце сарочку, я хацела б, каб у вас была ад мяне”, — пераказвала яе словы Шчыракова.
На гэтыя сродкі калекцыю папоўніла валынская сарочка, меркавана, пачатку ХХ стагоддзя. Для Ларысы яна стала і каштоўным набыткам, і асабістым знакам падтрымкі.