Беларуска Наталля апублікавала ў Threads водгук пра посуд Добрушскага фарфоравага завода. Яна высока ацаніла форму талерак з “абалдзенным борцікам” і прызналася, што гатовая была б скупіць усю серыю нават удвая даражэй. Але галоўнай праблемай, на яе думку, сталі нанесеныя на посуд піксельныя кветкі.
“Яны такой жудаснай якасці, што проста сапсавалі цудоўны фарфор”, — напісала аўтарка. Яна прапанавала заводу адмовіцца ад такога дэкору, падняць цану ў два-тры разы і ўкласціся ў добрую рэкламу. У допісе Наталля звярнулася і да афіцыйнага акаўнта прадпрыемства.
У каментарах хутка пачалася невялікая, але паказальная спрэчка. Адны пагадзіліся: кветкавая дэколь выглядае танна і псуе форму. Іншыя пісалі, што для дачы ці “кантры-вайбу” такі посуд цалкам пасуе, асабліва за сваю цану. Адна з каментатарак адзначыла, што купіла добрушскі посуд для дома і “кайфуе”, хоць ёй таксама не хапае якаснага роспісу і нармальных па памеры супавых талерак.
Аўтарка допісу акрэсліла дылему пакупніка так: “Я на раздарожжы. Не разумею, чаго будзе больш: радасці ад прыгожага фарфору ці раздражнення ад гэтых кветачак”.
Добрушскі фарфоравы завод — адзіны ў Беларусі вытворца фарфоравага посуду. Будаваць яго пачалі ў 1975 годзе, а першую прадукцыю выпусцілі 28 снежня 1978-га. Прадпрыемства неаднаразова мадэрнізавалі; апошняе абнаўленне абсталявання для ізастатычнага прэсавання адбылося ў 2024 годзе. Апошнія гады для завода былі няпростымі. Пасля пачатку поўнамаштабнай вайны ва Украіне і санкцыйных абмежаванняў кіраўніцтва “Беллегпрама” прызнавала, што прадпрыемства мела цяжкасці з пераарыентацыяй экспарту: раней еўрапейскі рынак займаў у ім значнае месца. У 2024 годзе былога дырэктара завода Аляксандра Вінакурава асудзілі на дзевяць гадоў калоніі паводле справы аб карупцыі.