Лодзінскі заапарк запусціў неардынарную валянцінаўскую ініцыятыву: любы ахвочы можа «ўсынавіць» мадагаскарскага таракана, даць яму імя — напрыклад, у гонар былога або былой — і сімвалічна скончыць гэтую гісторыю, скарміўшы насякомае сурыкатам.
«У цябе ёсць экс? У нас ёсць таракан. А сурыкат ужо чакае… У Дзень святога Валянціна ў нашым Арыентарыуме вы можаце даць таракану імя былой ці былога і сімвалічна закрыць пэўную главу», — гаворыцца ў паведамленні заапарка.
Ініцыятыва выклікала актыўнае абмеркаванне ў сацсетках. Беларусы, у прыватнасці, прапануюць называць тараканаў «лукашэнка», надаючы акцыі дадатковы палітычна-сатырычны падтэкст.
У межах кампаніі прапануюцца тры пакеты ўдзелу:
Базавы пакет (50 злотых): «ўсынаўленне» таракана, прысваенне яму імя і электронны сертыфікат удзелу.
Преміум-пакет (150 злотых): сертыфікат і фота моманту, калі таракан з’ядаецца адным з сурыкатаў.
VIP-пакет (300 злотых): сертыфікат і магчымасць асабіста скарміць таракана сурыкатам.
Усе сабраныя сродкі будуць пералічаныя ў Pangolin Foundation — фонд, які займаецца аховай навакольнага асяроддзя і захаваннем знікаючых відаў жывёл.
Кампанія будзе доўжыцца з 1 па 28 лютага 2026 года.
