У Гомелі «разрастаецца сетка міратворчых дзіцячых атрадаў»
Падобна на тое, што жаданне выслужыцца і даць справаздачу аб «планамерна праведзенай працы» у ідэолагаў Гомельшчыны такое вялікае, што іх дзеянні і публікацыі ў мясцовай прэсе перасталі лавіць усялякую сувязь з рэальнасцю і здаровым сэнсам.
Мяркуйце самі. Вось, да прыкладу, цытата з апошніх навін рэгіёна: «Міратворцы Гомельшчыны ўпэўнены, што менавіта праз дзіцячую дыпламатыю можна дабіцца максімальна шчырага і сумленнага дыялогу паміж краінамі. Таму сетка міратворчых атрадаў у Гомельскай вобласці з кожным годам расце: яны з’яўляюцца як у школах абласнога і раённых цэнтраў, так і ў невялікіх населеных пунктах рэгіёну».
Пра якую дзіцячую дыпламатыю ідзе гаворка? Прычым тут дзеці? Прычым тут яны ж у ролі міратворцаў? І як, на думку аўтараў гэтых перлаў, «дзеці праз сваю дыпламатыю могуць дамагчыся максімальна сумленнага дыялогу паміж краінамі» – застаецца толькі здагадвацца.
Да навіны, дарэчы, прыкладаюцца фатаграфіі. На іх школьнікі ў бела-блакітнай форме запускаюць галубоў свету і пазіруюць для фота разам з супрацоўніцай міліцыі, настаўнікамі, дырэктарскай школы і некалькімі чыноўнікамі каля прысвоенага іх школе стэнда з надпісам «Школа міру».
«Штодзень» вырашыў высветліць, што да чаго. Аказваецца, такія «міратворчыя мерапрыемствы» у рэгіёне праводзіць Беларускі Фонд міру, які ў дзень свайго заснавання ўручыў статус школы свету (размова ідзе пра сярэднюю школу №62 Гомеля) яе дырэктарцы Жанне Царык. Прытым уручыў яго галоўны міратворац вобласці Цімафей Глушакоў.
Ад пачатку вайны ва Украіне Фонд, пра які амаль ніхто нічога не чуў дагэтуль, пачаў дзейнасць надзвычай актыўна. Так, да прыкладу, мы даведаліся, што толькі ў мінулым годзе такое званне атрымалі яшчэ шэсць устаноў адукацыі рэгіёна. Раней жа, да вайны, апошнім разам яго давалі больш за 10 год таму. Сам жа Беларускі Фонду міру, аказваецца, існуе ў нашай краіне ўжо больш за 60 гадоў. І вось што пра яго распавядае мясцовая гомельская прэса з нагоды «міратворчага мерапрыемства»:
«За гэты час грамадскае аб’яднанне не словам, а справай даказала: толькі дыпламатыя здольная захаваць мір і згоду паміж краінамі. У Гомельскай вобласці праца фонду непарыўна звязана з імем Цімафея Глушакова, які чвэрць стагоддзя ўзначальвае абласное аддзяленне. Галоўным прынцыпам у працы ён называе забеспячэнне стабільнасці дзяржавы».
Асабліва здзекліва ўсё гэта гучыць менавіта ў кантэксце Гомельскай вобласці, жыхары якой у пачатку вайны чулі гукі выбухаў, бачылі калоны чужой ваеннай тэхнікі і фіксавалі запускі ракет.
Штодзень