Сляды жыццядзейнасці хахулі выявілі на 200-кіламетровым участку поймы Сожа ў Гомельскай і Магілёўскай абласцях. Новымі падрабязнасцямі знаходкі падзяліўся праект “Дзікая прырода ў сэрцы”.
Гэта азначае, што гаворка ідзе не пра адзінкавае месца выяўлення. Пры гэтым колькасць звяркоў у Беларусі ў паведамленні не называецца.
“Штодзень” ужо пісаў пра вяртанне хахулі ў лік відаў, прысутнасць якіх выявілі ў Беларусі. Раней яе лічылі зніклай на тэрыторыі краіны: у Чырвоную кнігу БССР звярка ўключылі ў 1981 годзе, а ў выданне 1993-га ён ужо не трапіў як зніклы від.
Знайсці сляды прасцей, чым убачыць звярка
Хахуля вядзе скрытны лад жыцця: жыве ў норах, корміцца пад вадой і актыўная пераважна ўначы. Таму даследчыкі шукаюць прыкметы яе прысутнасці. Сярод апублікаваных матэрыялаў — фотаздымак так званага кармавога століка з рэшткамі ракавін, зроблены вядучай навуковай супрацоўніцай НПЦ НАН Беларусі па біярэсурсах Ірынай Крышчук.
Фота: Дзікая прырода ў сэрцы
Паводле праекта, пошукі праводзілі ў межах даследавання статусу хахулі ў Беларусі, арганізаванага расійскім фондам “Природа и люди” пры падтрымцы фонду кампаніі Siberian Wellness “Мир Вокруг Тебя”.
Што пагражае хахулі
Аўтары паведамлення называюць сярод асноўных пагроз змяненне рачных поймаў праз меліярацыю, выпростванне рэк і абвалаванне. Зарастанне і высыханне пойменных азёр і старыц пазбаўляюць хахулю прыдатных месцаў жыцця. Іншая пагроза — інвазійная амерыканская норка, якая палюе на гэтых звяркоў. Небяспечныя таксама рыбалоўныя сеткі і пасткі: трапіўшы ў іх, хахуля не можа ўзняцца на паверхню па паветра. Праект заклікае вярнуць від у Чырвоную кнігу Беларусі, працягнуць пошукі месцаў яго пражывання і ўзяць іх пад ахову.