У адказ на зварот моўнага інспектара Ігара Случака пра тое, што беларускую мову незаслужана пазбягаюць на этыкетках прадукцыі і на афіцыйных сайтах кампаніі, у Conte далі “тыповую” адпіску.
Фота: Павел Берасьнёў
Ігар Случак ужо не першы год змагаецца з беларусафобіяй і выступае за папулярызацыю беларускай мовы. З гэтай нагоды юрыст і праваабаронца напісаў гігабайты зваротаў беларускім чыноўнікам у самыя розныя ведамствы і кіраўніцтвам самых розных кампаній і арганізацый. Кожны раз праваабаронца робіць акцэнт на тым, што беларуская мова, якая ў Беларусі мае статус адной з афіцыйных, выкарыстоўваецца выключна рэдка. Здараецца, чыноўнікі даюць вельмі дзіўныя адказы. Але часцей за ўсё абыходзяцца класічнымі адгаворкамі.
Дарэчы, прыкладна таксама здарылася і з кампаніяй Conte, у якую нядаўна Случак адправіў чарговы зварот. Адказ, на шчасце, прыйшоў на беларускай мове. Але вось змест яго аптымізму не выклікае:
“Пытанне аб размяшчэнні інфармацыі на беларускай мове на этыкетках тавару, які выпускаецца нашай кампаніяй па вашым папярэднім запыце было разгледжана на нарадзе кіраўніцтва і супрацоўнікаў кампаніі. Па выніках нарады вызначана, што цяпер такой магчымасці няма, улічваючы абмежаваны памер этыкетак і неабходны склад інфармацыі аб тавары на ўпакоўках і этыкетках у адпаведнасці з заканадаўствам”.
То бок, віной – невялікі памер этыкеткі, якую, мяркуючы па ўсім, замяніць вельмі праблематычна?
Ідзём далей:
“Канстытуцыяй Беларусі дзяржаўнымі мовамі прызнаныя беларуская і руская мовы, таму размяшчэнне інфармацыі аб тавары не з’яўляецца парушэннем з нашага боку, як і з боку многіх іншых айчынных вытворцаў”, – пішуць у адказе.
Ну, тут наогул “класіка жанру”, якой апелююць большасць арганізацый. Але надзея, хоць і маленькая, усё ж цепліцца. Таму што хоць дзесьці беларуская мова ўсё ж прысутнічае.
“У сапраўдны момант афіцыйны сайт кампаніі Контэ прадстаўлены на рускай і англійскай мовах, а на аптовых платформах В2В, у залежнасці ад настроек асабістага кабінета карыстальніка, на 7 мовах, уключаючы беларускую”.
Ну і вішанька на торце:
“Аб стаўленні да беларускай мовы – безумоўна, гэта адна з найпрыгажэйшых усходнеславянскіх моў, якая з’яўляецца роднай для беларусаў і прызнаная дзяржаўнай нацыянальнай мовай нароўні з рускай. У нашай кампаніі налічваецца немалая колькасць работнікаў самай рознай нацыянальнасці, таму ўсё справаводства вядзецца на рускай мове”.
Штодзень