Да свята, якое ідэолагі часцяком называюць галоўным святам Беларусі, 9 траўня застаецца ўсяго некалькі дзён. У гэты час звычайна наступае пік «перамогаманіі», у 2024 годзе нашылі свежанькай формы тых часоў і апранулі яе на дзяцей і моладзь.
Фотачэлендж абвясціла буда-кашалёўская раёнка. Увесь дасланы матэрыял: дзеці рознага ўзросту ў вайсковай савецкай форме. Асноўны хэштэг «акцыі» – #кзащитеродиныготов.
Рэдакцыя прапанавала фота дасылаць, але насамрэч не зусім зразумела, ці ўсе з іх патрапілі ў дзяржсмі ад бацькоў і ці маюць яны дазвол на публікацыю.
У Лельчыцах дзейнічаюць па такой жа метадычцы: мясцовая раёнка абвясціла відэачэлендж. Там плануюць збіраць відэадоказы ўдзелу з сацсетак пад хэштэгам #1941_1945ПОМНИМ, таму пакуль што маюць толькі адзін ролік дзяўчыны ў сучаснай вайсковай форме, якая размахвае дзяржаўным сцягам.
Хойніцкая раёнка апублікавала фотасесію мясцовага дзіцячага садка, які на сёння займае першае месца ў антырэйтынгу «перамогаманіі». Там дзяцей вывелі на фотасесію ў савецкай форме на танк дзіўнай расфарбоўкі.
