Валеры Сляпухін, які вымушаны быў з’ехаць з Гомеля з палітычных прычын, цяпер дапамагае беларуска-ўкраінскаму валанцёрскаму хабу, які адкрыўся сёлета ў Кіеве. За восень Валеры Сляпухін перагнаў пяць аўтамабіляў. На гэтым тыдні гомелец дапамог адправіць рэанімабіль з Уроцлава ў Кіеў.
Валеры Сляпухін:
— Мая задача — сустрэць аўтамабіль, перагнаць яго. Я пераводжу аўтамабілі і ў Кіеў, і ў Львоў, і да мяжы. Быў аўтобус з гуманітаркай, дзе былі медпрэпараты. Выдаткоўваю свой час на валанцёрства і дапамогу Украіне, паколькі цяпер многае залежыць ад таго, як далей будзе развівацца супрацьстаянне Украіны з Расеяй. Перамога Украіны — гэта шанец на незалежнасць і для Беларусі”.
Беларуска-ўкраінскі валанцёрскі хаб распачаў сваю працу ў траўні гэтага года. Звяртацца туды па дапамогу могуць як беларусы, так і ўкраінцы. Сярод мэтаў хаба — фармаванне пляцоўкі для сумеснага дыялогу і валанцёрскага руху беларусаў ва Украіне.
