Год таму Расея з тэрыторыі Беларусі напала на Украіну: стасункі паміж Гомельскай і Чарнігаўскай абласцямі за год спыніліся цалкам.
Гандлёвы комплекс “Эпіцэнтр”, у які любілі прыязджаць пакупнікі з Гомеля
Спыненне транспартнага спалучэння
Ад Гомеля да Чарнігава па прамой 107 км, па шашы – 135 км. Да вайны жыхары Гомельшчыны, асабліва Гомеля, езділі ва Украіну на шопінг, альбо каб адпачыць на мора ці ў горы. Цяпер гэта спынілася. І чакаць, што транспартнае спалучэнне адновіцца ў бліжэйшы час не выпадае.
Адзін з сімвалаў Чарнігава — гатэль “Украіна” пасля трапляння расейскай ракетай
Закрытыя ўсе памежныя пераходы
Раней у Гомельскай вобласці на мяжы з Украінай было некалькі памежных пропускаў. Самыя папулярныя з іх – гэта Камарын, Новая Гута, Весялоўка. Аднак цяпер яны ўсе закрытыя. Праехаць і прайсці ва Украіну з тэрыторыі Гомельскай вобласці афіцыйна немагчыма.
Чарнігаў спыніў пабрацімскія стасункі з Гомелем
Менавіта з тэрыторыі Гомельшчыны расійскія войскі наступалі ў кірунку Кіева і пабраціма Гомеля – Чарнігава. Горад трымаўся ў аблозе акупацыйных войскаў, якія падвяргалі яго рэгулярным абстрэлам. Дараваць такое “сяброўскае” стаўленне чарнігаўцы не сталі і афіцыйна абвесцілі аб прыпыненні пабрацімскіх сувязаў з Гомелем. Больш падрабязна пра гэта “Штодзень” пісаў тут.
Зніклі назвы вуліц, звязаных з Беларуссю
У Чарнігаве змянілі назвы вуліц, звязаных з Беларуссю. Так, ва ўкраінскім горадзе не стала вуліцы Гомельскай. Яе перайменавалі ў вуліцу Січовых стрільців. Вуліца Беларуская стала вуліцай Стародубського полку.
Прыгарад Чарнігава пасля расейскіх абстрэлаў
Згарнуліся эканамічныя сувязі
Напрыклад, у Светлагорску спыніў працу завод зварачных электродаў. У склад заснавальнікаў уваходзіла вінніцкае публічнае акцыянернае таварыства “ПлазмаТэк”. Як паведамляў сайт “Ранак”, украінскі акцыянер інвеставаў у прадпрыемства ў Светлагосрку каля 1 мільёна долараў. У сакавіку 2022 года завод прыпыніў працу па прачыне вайны ва Украіне. На той момант на сайце завода нават была апублікаваная афіцыйныя заява кіраўніцтва завода, што ў выпадку, калі армія Рэспублікі Беларусь не будзе прымаць удзел у вайне супраць Украіны, кіраўніцтва разгледзіць пытанне аб аднаўленні дзейнасці завода. На дадзены момант дадзеная заява не дасяжная. А сам завод нацыяналізаваны беларускай дзяржавай.
Пасля заканчэння вайны давядзецца дзесяцігоддзямі наладжваць адносіны між народамі
Спыніліся трансгранічныя праекты
Паміж Гомельскай і Чарнігаўскай абласцямі развівалася трансгранічнае супрацоўніцтва. Напрыклад, рэалізоўваліся падобныя праекты: “Ад партнёрства мясцовых музеяў да шырокага трансгранічнага культурнага супрацоўніцтва” паміж музеямі Гомельскай і Чарнігаўскай абласцямі. Праходзілі круглыя сталы кшталту: “Праз умацаванне міжсектарнага развіцця трансгранічнага супрацоўніцтва” з удзелам прадстаўнікоў грамадскіх арганізацый і мясцовых органаў дзяржаўнай улады Чарнігаўскай і Гомельскай абласцей.
А самае галоўнае, змянілася стаўленне да беларусаў. Да вайны на Чарнігаўшчыне з радасцю чакалі беларусаў. Цяпер, пасля года вайны, разбурэння ўкраінскіх гарадоў не варта чакаць, што гомельцаў з радасцю будуць чакаць у Чарнігаве.
