Акцёры Гомельскага абласнога драматычнага тэатра прадставілі відэафільм “Дваццаць пяць…” — вершы Максіма Багдановіча ў ім спалучаюцца з музыкай і гомельскімі краявідамі ў розныя поры года.
Фільм прысвечаны 135-годдзю з дня нараджэння класіка беларускай літаратуры. “З любоўю”, — так аўтары вызначылі настрой працы ў апісанні відэа. Асаблівую цеплыню ёй надаюць беларуская мова і знаёмыя гарадскія пейзажы: Гомель тут становіцца прасторай, у якой гучыць паэзія Багдановіча.
Вершы чытаюць 20 акцёраў тэатра, сярод іх Сяргей Лагуценка, Галіна Вевер, Юрый Фейгін, Аляксандра і Аляксей Бычковы. Рэжысёрам выступіў Дзмітрый Байкоў, які таксама ўдзельнічаў у чытанні. Відэаздымку і мантаж зрабіў Аляксей Муславец.
“Дваццаць пяць…” можна паглядзець цалкам у вольным доступе — і паслухаць беларускую паэзію ў выкананні гомельскіх акцёраў.
