Гомельцы ўсё часцей адкрыта кажуць: гэтая зіма паказала, што камунальныя службы не справіліся з уборкай снегу. Тым часам прапагандыстаў фактычна кінулі на “адбельванне” працы ЖКГ — аднак беларусы з такім падыходам не згодныя. Некаторыя каментатары нават патрабуюць адстаўкі кіраўніка краіны.
Цягам зімы гомельцы абураліся непачышчанымі вуліцамі
Праўладны блогер Васянін, якога раней можна было заўважыць на форуме блогерскай супольнасці, арганізаваным старшынёй Гомельскага гарвыканкама Прывалавым, апублікаваў відэа ў падтрымку камунальнікаў. У роліку ён сцвярджае, што грамадства нібыта падзялілася на два лагеры: тых, хто лае камунальнікаў, і тых, хто ім дзякуе.
Сам блогер лічыць, што праблемы з уборкай снегу — гэта чалавечы фактар, і заклікае ставіцца да сітуацыі з разуменнем. Ён прапануе быць пазітыўнымі і дзякаваць усім, хто робіць жыццё лепшым: камунальнікам, міліцыянтам, цырульнікам, памежнікам і іншым.
Але ў каментарах пад відэа гомельцы масава не пагадзіліся з такой пазіцыяй.
— Давайце без гэтых “давайце”. Проста прызнаем як факт: гэтая зіма паказала, што ЖКГ не справілася з прыборкай снегу. Дакладней — нават не спрабавала. У дварах снег прыбіралі ўсе: настаўнікі, лекары, рабочыя, кіроўцы, пенсіянеры… Але тых, хто павінен быў гэта рабіць, я бачыла толькі на фотаздымках.
— Муж за зіму пабываў у 12 гарадах Беларусі — і вялікіх, і малых. Гомель чамусьці аказаўся самым непрыбраным (калі мякка сказаць).
— Які гэта чалавечы фактар? Гэта фактар сістэмы. Няма рэсурсаў.
— На нашай тупіковай вуліцы за ўсю зіму трактар ні разу не праехаў. Затое на суседняй вуліцы награблі вялізны бархан на выездзе з нашага тупіка — ні людзям не прайсці, ні машыне не праехаць
— Камунальнікаў проста няма. Тут больш пытанняў да іх кіраўніцтва.
Гомельцы іранічна дзякуюць камунальнікам за своечасовы вываз снегу
— Не трэба было скарачаць дворнікаў.
— Нашы “паважаныя” дэпутаты самі вырашылі іх скараціць.
Некаторыя каментатары ідуць яшчэ далей і ўскладаюць адказнасць за сітуацыю на вярхі ўлады, сцвярджаючы, што праблемы ЖКГ — гэта вынік сістэмных рашэнняў.
Водгукі гомельцаў пра правал працы ЖКГ
Мы неаднаразова гэтай зімой уздымалі пытанне кепскай працы камунальных службаў у Гомелі і тлумачылі, чаму ЖКГ не справілася з уборкай снегу. Сыходзячы па рэакцыі жыхароў, праблема застаецца вострай — і афіцыйныя спробы змякчыць крытыку пакуль не пераконваюць людзей.
