Навіны горада

Збор сродкаў на пераклад культавай кнігі пра графа Дракулу атрымаўся паспяховым

Беларусы перавысілі неабходную суму для друку кнігі. Такім чынам, перакладу на беларускую мову вядомага рамана Брэма Стокера быць

Мы паспяхова скончылі збор на кнігу “Дракула” Брэма Стокера. Па ўражаннях, гэта было падобна на такое падарожжа, у якое збіраешся і не ведаеш, дзе, калі і чым яно скончыцца. Але дзякуючы ўсім тым, хто адгукнуўся і падтрымаў праект, кніга будзе надрукавана. Засталося дачакацца, калі Кікстартар апрацуе пасля 30 лістапада ўсё плацяжы (для гэтага трэба, каб ва ўсіх аказаліся грошы на картах) і зрабіць замову ў друкарні. А потым чытачам застанецца толькі дачакацца свае кнігі на пошце ці ў пачкаматах. Яшчэ раз усім дзякуй, хто дапамагаў нам стварыць гэтую кнігу. Без вас яе б не было!” – Падзяліўся радаснай навінай са “Штоднём” перакладчык і выдавец кнігі Сяргей Козыраў.

Нагадаем, у канцы кастрычніка гомелец Сяргей Козыраў ініцыяваў збор сродкаў на пераклад і выданне класікі гатычнага раману “Дракула” на беларускай мове.

“Варыянты перакладаў на рускую мову скарочаныя (скарочана амаль на 30% ад тэкста арыгінала). Да таго ж, яны падвергліся цэнзуры. Наш пераклад поўны, захоўваюцца намёкі на блізкія зносіны паміж дзяўчынамі, эратызм. Мы пастараліся перадаць тое, што Ван Хельсінг – не носьбіт ангельскай мовы. Іншымі словамі, чытачы ўпершыню могуць прачытаць поўную версію “Дракулы” на роднай мове”
, – распавядаў у пачатку збору Сяргей Козыраў.

Для тых, хто яшчэ жадае атрымаць асобнік кніжкі, засталася апошняя магчымасць зрабіць замову.

Раман ірландскага пісьменніка Брэма Стокера “Дракула” быў упершыню апублікаваны ў Лондане ў 1897 годзе. Выданне мела шалёны поспех у аўдыторыі, а сюжэт выкарыстоўваўся ў далейшым для стварэння шматлікіх твораў мастацтва.

Сяргей Козыраў — менеджар з Гомеля, які на добраахвотнай аснове займаецца папулярызацыяй беларускай мовы з дапамогай коміксаў. За апошнія 10 год ён пераклаў на беларускую мову і выклаў для агульнага карыстання больш за 400 вядомых коміксаў.

Штодзень