У 2023 годзе ў Гомельскай вобласці зафіксаваны рост махлярстваў, крадзяжоў маёмасці праз інтэрнэт і банкаўскія карткі, колькасць тэлефонных махлярстваў вырасла на 30%. Асноўныя ахвяры злачынстваў беларусы ва ўзросце.
![](https://homeldays.org/wp-content/uploads/2024/01/23f-1024x682.jpg)
Ілюстрацыйнае фота
Такія звесткі са спасылкай на пракуратуру паведамляюць дзяржСМІ.
Старэйшы памочнік пракурора Гомельскай вобласці Таццяна Жызнеўская скардзіцца на «залішнюю даверлівасць» грамадзянаў, якія паведамляюць дадзеныя сваіх банкаўскіх картак і бяруць крэдыты па просьбе злачынцаў.
«Ёсць пэўныя вынікі, меней цяжкіх злачынстваў зроблена: забойстваў, гвалтоўных злачынстваў. Але, на жаль, ёсць моманты, якія трэба выпраўляць. Гэта перад усім рост махлярства і ў IT-сферы, і перад усім трэба абараняць пажылых людзей», – заявіў у Гомелі намеснік генпракурора Аляксей Стук.
Таксама з інфармацыі мясцовай раёнкі вядома, што за 2023 год зафіксавана 89 махлярстваў, большасць з іх (59) здзейсненыя ў інтэрнэце. Ахвярамі ашуканцаў сталі 12 грамадзян пажылога ўзросту (у 2022 годзе – 12). Злачынцы не ўстаноўлены.
Пры гэтым, ужо відавочна, што дзейсных механізмаў па барацьбе з гэтым відам злачынстваў беларускія сілавікі прапанаваць не могуць, фактычна ускладаючы адказнасць за наступствы ці на ахвяраў махлярстваў (згубу грошаў ніхто не кампенсуе, а калі пад уплывам махляроў людзі робяць супрацьпраўныя дзеянні, у справе яны могуць патрапіць на лаву падсудных), ці на іх сваякоў.
Сярод актуальных парадаў пракуратуры актывацыя для сваякоў ва ўзросце паслугі, якая б забараняла званкі ад невядомых кантактаў.