Навіны горада

Леанід Судаленка пра смерць палітвязня Ігара Ледніка: “У турме людзей забіваюць!”

Вядомы гомельскі праваабаронца адрэагаваў на чарговы факт гібелі палітвязняў за кратамі

Былы палітвязень і вядомы праваабаронца Леанід Судаленка падзяліўся сваімі думкамі наконт сітуацыі з гібеллю Ігара Ледніка ў бабруйскай калоніі, а таксама выказаўся на тэму таго, што могуць рабіць беларусы для недапушчэння такіх выпадкаў у далейшым.

Леанід Судаленка Фота: з асабістай старонкі ў ФБ

Леанід Судаленка:
Казаў і яшчэ раз кажу – людзі паміраюць дома ці ў лякарнях. У турме людзей забіваюць! Бо калі чалавек хворы, яго трэба лячыць. Калі моцна хворы, вызваляць ад пакарання. Інакш прыгавор суда аб пазбаўленні волі = смяротнаму пакаранню…

І зноў не адпускаюць думкі аб палітвязнях, якіх утрымліваюць у нечалавечых умовах. Асабліва ў якіх вялікія тэрміны. Там гэта часта гучыць як “ніколі”. У сэнсе, ніколі не скончыцца тэрмін! Інтэлектуальна кожны задумваецца над сэнсам жыцця і магчыма не раз развітваецца з ім. Маральна там цяжка ўдвая, таму што не адпускае разуменне прававога бязмежжа, ты за кратамі без злачынства, толькі за тое, што не згодзен!

Што можа выратаваць нашых палітычных, асабліва тых, хто з вялікімі тэрмінамі? Я не знаходжу адказу на гэтае пытанне, у нас няма сёння моцнай перамоўнай пазіцыі. Затое ў нас ёсць тое, чаго нельга адабраць, гэта наш голас! Прапаную не маўчаць, крычаць гучней і гучней аб тым, як рэжым павольна забівае нязгодных беларусаў. Наш голас пакідае сляды і там гэтага моцна баяцца. Яны баяцца хуткага справядлівага суда, што зараз з’яўляецца нашай галоўнай зброяй.

Гэта я ведаю дакладна!

Ігар Леднік


Ігар Аляксандравіч Леднік
— сябра БСДП з Барысава, быў затрыманы 18 красавіка 2022 года. Спачатку яму прысудзілі 15 сутак адміністрацыйнага арышту, але пасля іх ён на волю не выйшаў. На Ігара была заведзена крымінальная справа па ч. 2 арт. 367 КК “Паклёп на прэзідэнта Рэспублікі Беларусь”. Ігар Леднік меў інваліднасць 2-й групы праз праблемы з сэрцам. 18 ліпеня 2022 г. суд Барысаўскага раёна прызнаў інфармацыйную прадукцыю Facebook-старонкі Ігара Ледніка “экстрэмісцкімі матэрыяламі”. Ігар Леднік памёр ў мінскай раённай бальніцы, куды быў планава дастаўлены з бабруйскай калоніі № 2, дзе адбываў тэрмін. Як паведамляюць аднапартыйцы загінулага, прычынай яго смерці стала спыненне сэрца. На сёння гэта ўжо, як мінімум, пяты па ліку палітвязень, які загінуў за кратамі.

Штодзень