Гомельскі завод ліцця і нармаляў апублікаваў відэа з акцыі “Чысты чацвер”. У кадры жанчыны грабуць лісце і прыбіраюць тэрыторыю. Мужчын за гэтай працай у роліку не відаць. Прадпрыемства суправадзіла публікацыю бадзёрым каментаром: “Чыста там, дзе прыбіраюць з душой!”
“«Чысты чацвер» на ААТ «ГЗЛіН» прайшоў на ўра: зладжана, весела і вельмі прадуктыўна. Мы любім сваю працу і клапоцімся пра тое, каб навокал было прыгожа!” — паведамляе заводскі паблік.
Ці сапраўды ўдзельніцам было весела, ці маглі яны адмовіцца ад прыборкі і як яна ўлічвалася ў працоўным часе, у паведамленні не тлумачыцца. У Год беларускай жанчыны такое відэа выглядае асабліва паказальна. Замест размовы пра прафесійныя дасягненні, умовы працы і роўнае размеркаванне абавязкаў — жанчыны з граблямі пад лозунг пра прыборку “з душой”. Такая падача ўзнаўляе сэксісцкі стэрэатып: клапаціцца пра парадак павінна жанчына, прычым рабіць гэта з усмешкай.
“Штодзень” ужо разбіраў праблемы “Чыстага чацвярга”. Штотыднёвую акцыю ў Гомелі ў 2023 годзе ініцыяваў тагачасны кіраўнік гарвыканкама Уладзімір Прывалаў. Да прыборкі гарадскіх тэрыторый пачалі далучаць супрацоўнікаў розных дзяржаўных арганізацый. Пытанне тут не ў тым, ці патрэбная гораду чысціня. Пытанне — чаму рэгулярную працу па яе падтрыманні перакладаюць на людзей іншых прафесій. Калі камунальным службам не хапае супрацоўнікаў, тэхнікі ці фінансавання, штотыднёвыя выхады з мётламі не вырашаюць гэтых праблем. Прыборка ўласнай заводскай тэрыторыі таксама патрабуе арганізацыі і рэсурсаў. Калі супрацоўніц адрываюць ад асноўных абавязкаў, іх праца нікуды не знікае. Калі прыбіраць прапануюць пасля змены — узнікае пытанне пра асабісты час і аплату. У заводскім допісе адказаў няма: толькі “весела” і “на ўра”. Добраахвотная супольная прыборка можа быць карыснай ініцыятывай. Але яе добраахвотнасць вызначаецца магчымасцю адмовіцца без наступстваў, а не ўсмешлівым смайлікам у справаздачы.
У выніку заводская публікацыя паказала больш, чым, магчыма, планавалі яе аўтары: савецкую традыцыю мабілізацыі работнікаў на гаспадарчыя работы тут дапоўнілі звыклым вобразам жанчыны, якая павінна прыбіраць і радавацца. Павага да жанчын пачынаецца з павагі да іх працы і часу.
Штодзень-Homeldays
Можна пачытаць па тэме:
Што не так з прывалаўскай акцыяй “чысты чацвер”
Рэспубліканская акцыя “Чысты чацвер”. Гомельскі вопыт выкарыстання таннай рабсілы распаўсюджваецца па Беларусі
“Каб выдаць справаздачу за «чысты чацвер», плююць на праблемы людзей і пагражаюць супрацоўнікам “- работнікі “Гомельводаканала” пра тое, як іх выганяюць “паказальна махаць венікамі”
Відэа: паблік завода ЗЛІН
