Свята паэзіі ў Гарошкаве не праводзіцца ўжо тры гады запар
Спачатку арганізацыі свята перашкодзіла пандэмія, а потым рэпрэсіі
Апошні раз свята паэзіі адбывалася ў Гарошкаве ў лістападзе ў 2019 годзе на 60-годдзе паэта Анатоля Сыса. Пасля гэтага ніякіх мерапрыемстваў не было. Толькі прыватныя наведванні Гарошкава асобных людзей.
Ранейшыя мерапрыемствы з вершамі і песнямі ў гонар паэта Анатоля Сыса засталіся ў памяці, на відэа і на фотаздымках. Спачатку арганізацыі свята перашкодзіла пандэмія, а потым рэпрэсіі, у выніку якіх многія творцы вымушаныя былі з’ехаць з краіны. Таксама ў 2021 годзе быў ліквідаваны Саюз беларускіх пісьменнікаў, сябры якога наведвалі Гарошкаў і выступалі падчас свята паэзіі.
Сярод гасцей свята часта быў цяперашні нобелеўскі лаўрэат міра і сябар Анатоля Сыса Алесь Бяляцкі. Усе папярэднія гады гасцей на дзень народзінаў і на дзень смерці прымала ў бацькоўскім доме родная сястра паэта Тамара Ціханаўна Грыб.
Анатоль Сыс нарадзіўся ў 1959 годзе ў вёсцы Гарошкаў Рэчыцкага раёна. Пры жыцці паспеў выдаць тры зборнікі паэзіі „Агмень”, „Пан лес” і „Сыс”, якія былі высока ацэненыя крытыкамі і чытачамі.
Падпісвайцеся на нашыя каналы: https://t.me/shtodzien, https://www.facebook.com/sztodzien