Палітзняволеную педагога, велаактывістку з Гомеля Святлану Кароль дадалі ў спіс “экстрэмістаў”. Міністэрства ўнутраных справаў абнавіла сумна вядомы спіс, дадаўшы сярод новых 15 прозвішчаў палітычна асуджаных беларусаў, вядомую гамяльчанку. Усяго ў гэтым пераліку прозвішчаў – 4134 грамадзян Беларусі, большасць з якіх пацярпелі за свае палітычныя погляды.
Святлана Кароль
У адным з інтэрв’ю са Святланай Кароль, якое рабіў “Штодзень”, яна выказала некалькі думак адносна нашай драматычнай рэчаіснасці:
Пра рэпрэсіі
Рэпрэсіі, канешне, моцна задавілі і мяне, і іншых людзей. Але я вырашыла, што калі магу дапамагаць — дапамагаю, што ёсць добрага — паляпшаю. Стараюся сябе зберагчы такім чынам да той Беларусі, якая павінна настаць. Пішу лісты палітвязням, пералічваю грошы ў прытулак для бадзяжных жывёл, працягваю папулярызаваць роварны рух. Такім чынам атрымліваецца захаваць сваю цэласнасць. Цяжкі вельмі час, але што рабіць — без вялікіх крызісаў скачкоў не адбываецца. Калі кожны будзе сябе так зберагаць, то мы апынёмся ў лепшай Беларусі.
Пра беларускае грамадства
Беларускае грамадства вельмі таленавітае. Гарызантальныя сувязі ў Беларусі — узорна-паказальныя. Урбаністы, эколагі, абаронцы птушак і беларускай мовы, праваабаронцы, раварысты — НДА вырашалі вялікую колькасць пытанняў. Стасункі паміж арганізацыямі былі проста ідэальнымі. Мы — таленавітая нацыя, якая можа аб’ядноўвацца, дабівацца, паляпшаць. Калі беларусам развяжуць рукі — будзе шмат ініцыятыў, якія з гэтай краіны зробяць ляльку, я ўпэўнена ў гэтым на 250 адсоткаў.
Святлана Кароль
20 верасня 2023 г. Святлана Кароль знайшлася ў ІЧУ Гомеля, куды яе змясцілі па крымінальнай справе. 63-гадовую актывістку абвінавацілі паводле ч. 2 арт. 367 (паклёп у дачыненні да Лукашэнкі, злучаны з абвінавачаннем ва ўчыненні цяжкага або асабліва цяжкага злачынства і ч.1 арт. 130 (наўмысныя дзеянні, накіраваныя на ўзбуджэнне іншай сацыяльнай варожасці па прыкмеце іншай сацыяльнай прыналежнасці). Суд над Святланай пад кіраўніцтвам суддзі Вадзіма Бобырава пачаўся 11 сакавіка 2024 г. у Гомельскім абласным судзе. 28 сакавіка 2024 г. Святлана асуджаная на паўтара года калоніі агульнага рэжыму.