Як жыхары Беларусі адносяцца да рэкламы на беларускай мове? Такое апытанне правяло Міжнароднае агенцтва сацыяльных і маркетынгавых даследаванняў МАСМИ. Даследаванне правялі вясной гэтага года, апытаўшы 1 тысячу жыхароў гарадоў (Мінска, абласных цэнтраў і іншых) ва ўзросце ад 18 да 64 гадоў. І якія вынікі?
Ілюстрацыйнае фота
Так, 39% апытаных станоўча (вельмі станоўча або хутчэй станоўча) адносяцца да рэкламы на беларускай мове, прычым часцей такі адказ давалі старэйшыя асобы (55-64 гады). Палова рэспандэнтаў нейтральна адносіцца да такой рэкламы, а 9% выказалі сваё негатыўнае стаўленне (хутчэй негатыўна або скрайне негатыўна).
АЛЕ 63% апытаных адзначылі, што ў кожным разе звярнулі б увагу на тавар з пазнакай “Купляйце беларускае” або “Зроблена ў Беларусі”. Адна пятая частка кажа, што не звяртае ўвагі на такія абазначэнні (найчасцей асобы ва ўзросце ад 25 да 34 гадоў).
Рэспандэнты больш за ўсё згодны з такім выказваннем, што “Рэклама на беларускай мове – гэта нешта роднае, душэўнае і блізкае мне”, такіх 33% (сярод тых, хто так адказаў, больш асоб ва ўзросце ад 55 да 64 гадоў). Апытаныя таксама адзначаюць, што пры іншых роўных умовах звернуць увагу на тавар з назвай і рэкламай на рускай мове (глядзіце вынікі на другім здымку ). А вось у сітуацыі з лагатыпам колькасць адказаў прыкладна роўная.
Пры гэтым часцей лагатып на рускай мове адзначае маладое пакаленне, а на беларускай – узроставая група ад 45 да 54 гадоў.
А што вы думаеце пра такія вынікі даследавання?
Выкарыстаныя матэрыялы і фота з сайта myfin.by.