Тэрмін здачы рамонту пуцеправоду, які спалучае Сельмаш і Стары Аэрадром, у чарговы раз пераносяць. Гэтым разам на красавік 2025-га. Раней паведамлялася, што пешаходны мост можа быць адкрыты ўжо ў канцы 2024-га. Нягледзячы на запэўніванні службовых асоб, рэканструкцыя праходзіць са шматлікімі затрымкамі.
Так выглядаў мост да рэканструкцыі
У сюжэце на абласным тэлебачанні гаворыцца пра выкананы аб’ём працы: “Ужо разабраны пандус і лесвіца, дэмантаваныя апоры і падрыхтаваны падмурак. Будаўнікі запэўніваюць: рамонт ідзе па плане, аб’ект будзе здадзены ў красавіку наступнага года…”
Самы даўгі ў Беларусі пешаходны мост даўжынёй у 550 м. пачалі рамантаваць 1 жніўня 2024-га. Ён патрабаваў сур’ёзнай рэканструкцыі і абнаўлення ўжо даўно.
Рамонт неаднаразова адкладаўся (мост нават з помпай ужо адкрывалі пасля рамонту ў 2022 годзе, і абяцалі, што ён праслужыць 50 гадоў), улады спрабавалі таксама зрабіць яго больш танным.
На сёння большую частку раней агучанага пакуль плануюць зрабіць. А менавіта, умацаваць сам мост, абсталяваць навес, абнавіць лесвіцы.
Акрамя таго, абяцаюць і пандусы для людзей з абмежаванымі магчымасцямі. Выглядае на тое, што з улікам вышыні «Сельмашаўскага», там варта было б запраектаваць ліфты. Але на фоне спробаў зменшыць кошт праекту, на гэта разлічваць не варта.
Сельмашаўскі пешаходны мост быў узведзены ў Гомелі ў 1987-м годзе.