Прадстаўнікі грамадзянскай кампаніі “Наша Мова” атрымалі абуральны адказ з “Гарадзейскага цукровага камбінату”, з якога вынікае, што прадукцыя пад беларускамоўным брэндам “Літвінскі” больш выпускацца не будзе. Стыль, у якім вытрыманы ліст, нават на фоне цяперашняга, не самага спрыяльнага для беларускай мовы часу, выглядае выклікам для беларускага грамадства.
У лісце за подпісам намесніка гендырэктара па камерцыйнай дзейнасці А. Бацкеля ў хамскіх інтанацыях паведамляецца, што прадпрыемства “не плануе павялічваць колькасць этыкетак ці ўпаковак прадукцыі на беларускай мове, таму што ўся прадукцыя прадаецца і без выкарыстання мовы”. Адпаведна, як пішуць беларусафобы з цукразаводу ў афіцыйным адказе, “сэнсу штосьці мяняць і павялічваць выдаткі няма”. Таксама кіраўніцтва камбінату, нібыта ў захапленні ад сваёй беспакаранасці, працягвае: “Наша прадпрыемства не плануе дадаваць інфармацыю на пакунках вагой 1 кг на беларускай мове”. І, у якасці здзеку, аўтары адпіскі прапаноўваюць звярнуцца актывістам у вышэйстаячыя арганізацыі ці суд.
“Штодзень” не паленаваўся і зайшоў на старонку прадпрыемства ў сеціве. І ў нас з’явілася здагадка, чаму з палічак беларускіх крам раптам знік папулярны брэнд “Літвінскі”, які калісьці выпускаўся ў Гарадзеі. Апроч гэтага, стала зразумела, адкуль у нейкага намесніка дырэктара такая фанабэрыя ў дачыненні да спажыўцоў. Справа ў тым, што ў пачатку 2022 года гэтае прадпрыемства ўзначаліў экс-старшыня Гомельскага аблвыканкаму Генадзь Салавей. Былы чыноўнік, хоць яго і панізілі ў пасадзе, на свае замашкі рэгіянальнага правадыра, відаць, не забыўся. Таму і дазваляе сабе такія выпады на адрас грамадзян. Ці, прынамсі, патурае некаторым сваім падначаленым, якія беларускі хлеб есці любяць, а мову народа, які іх корміць, не паважаюць.
Зазначым ад сябе, што Генадзь Салавей у памяці гомельцаў нічым добрым асабліва не адзначыўся. Яго запомнілі толькі праз узвядзенне недарэчнага 60-метровага флагштоку на галоўнай плошчы і тым, што ён “абедаў з камбайнёрамі ў полі”. А цяпер да такой не надта слаўнай біяграфіі, відаць, дадасца пункт пра ягоную нелюбоў да беларускай мовы, на якой, дарэчы, у ягонай роднай вёсцы Тупалы Наваградскага раёна яшчэ якіх гадоў 50 таму размаўлялі ўсе карэнныя жыхары.