На фота, якое з гэтай нагоды апублікавалі мясцовыя тэлеграм-каналы і іх сацсеткі, – тры ўсмешлівых і шчаслівых адзінаццацікласніцы. Трохі шакіруе, што ніхто нават не хавае імёнаў і прозвішчаў гэтых дзяўчат. Хоць уезд на тэрыторыю анексаванага Крыму з боку Расеі забаронена заканадаўствам Украіны. І гэта ўжо не кажучы пра вайну, якую прама цяпер Расея вядзе супраць Украіны і якая ў любы момант прыйдзе на тэрыторыю паўвыспы Крым.
Фота: з сацсетак
Тым не менш, нішто з гэтага не бянтэжыць ні саміх дзяўчат (але яны яшчэ непаўналетнія – рэд.), ні іх бацькоў, педагогаў і арганізатараў конкурсу (і вось да іх пытанняў сапраўды шмат – рэд.).
Паказальнымі, на наш, погляд, з’яўляюцца каментары і ў Instagram пад постам пра будучы “адпачынак” дзяўчат з Гомеля ў “Артэку”. Яны ўжо традыцыйна для беларускага грамадства падзяліліся на два лагеры.
У адным пішуць: “Дзяўчаты малайцы, Брава: усюды ўдзельнічаюць, выкарыстоўваюць усе магчымасці)) а не як некаторыя канапавыя эксперты толькі сядзяць у тэлефонах і пішуць пра “паўваеннае становішча”(знаходзіцца ў Гомелі ці ў бабулі ў вёсцы пад Зябраўкай нікога чамусьці не бянтэжыць)”.
У другім: “Бацькі гатовыя адправіць сваіх дзяцей у Крым цяпер? Але, у цэлым, і не здзіўлюся…”, “Ігнараванне рэальнасці набывае жудасныя маштабы”.
Ну вось яна тая самая – адна краіна з дзвюма рэальнасцямі.
