Навуковец прааналізаваў сайты пяці беларускіх РНПЦ і знайшоў там… 90% бескарысных для пацыентаў ці медперсаналу матэрыялаў.
Фота: скрыншот тэлеграм-канала Гомельскага РНПЦ радыяцыйнай медыцыны і экалогіі чалавека
Як піша на сваёй старонцы ў Фэйсбук псіхіятр і навуковец Уладзімір Пікірэня, рэспубліканскія цэнтры павінны не толькі лячыць складаныя выпадкі, але і займацца навукова-педагагічнай дзейнасцю. Усе РНПЦ маюць свае тэлеграм-каналы. Якасць тэкстаў у РНПЦ псіхічнага здароўя, на думку эксперта, настолькі нізкая, што, каб не ведаць пра статус афіцыйнай крыніцы інфармацыі, можна было б закінуць канал у спам. Так з’явілася ідэя прааналізаваць тэлеграм-каналы 5 выпадковых РНПЦ з падлікам каэфіцыента карыснасці матэрыялаў. Вынікі міні-даследавання публікуюць Белыя халаты.
Фота: www.belhalat.news
Аналіз кантэнту РНПЦ псіхічнага здароўя, кардыялогіі, траўматалогіі і артапедыі, неўралогіі і нейрахірургіі, отарыналарынгалогіі за 3 месяцы (сакавік, красавік, май) 2025 года дазволіў выдзеліць наступныя тэмы публікацый:
– інфармацыя для супрацоўнікаў
– інфармацыя для пацыентаў
– інфармацыя пра правядзенне профільных мерапрыемстваў,
– інфармацыя па профільных пытаннях, што датычацца сучаснай медыцынскай службы, працы кіраўнікоў цэнтраў, нарматыўна-прававых актаў,
– анонсы і справаздачы пра ўдзел кіраўнікоў у прапагандысцкіх і непрофільных мерапрыемствах
– нейтральныя публікацыі (віншаванні са святамі ці гумар)
– рэпосты канала міністэрства аховы здароўя
– перадрук прапаганды
У выніку каэфіцыент карыснасці інфармацыі вагаецца ад 2,5% да 36,3%. Рэпосты прапагандысцкіх матэрыялаў займаюць у сярэднім 58%. Фота: www.belhalat.news
Як падсумоўвае аўтар, прааналізаваныя каналы РНЦП варта прызнаць амаль бескарыснымі, бо яны публікуюць больш прапаганды, чым каштоўных для медперсаналу і пацыентаў інфармацыі.
