У Рэчыцы пачаўся чарговы “суд” над палітычнай зняволенай, маці дваіх непаўналетніх дзяцей, Палінай Шарэнда-Панасюк. Як і раней, грамадская дзяячка адмаўляе “суду” ў легітымнасці і лічыць сябе ваеннапалоннай.
Паліна Шарэнда-Панасюк падчас антыдармаедскай акцыі ў Берасці ў 2017 годзе. Фота: ПЦ “Вясна”
Яе муж, Андрэй Шарэнда, паведамляе падрабязнасці таго, як праходзіць чарговае судзілішча над берасцейкай:
“З самага пачатку Паліна, адмовілася прызнаваць “суд” і “суддзю” Станіслава Іванюценку легітымнымі. Яна заявіла, што і надалей лічыць сябе ваеннапалоннай. Таксама Паліна засведчыла, што адмовілася ад беларускага грамадзянства і не хоча мець нічога агульнага з дыктатарскім рэжымам. Сёння былі заслуханы “сведкі” з адміністрацыі калоніі, якія з паперак зачыталі ўсе тыя “правапарушэнні рэжыму адбывання пакарання”, якія нібыта здзейсніла Паліна. Цікава, што адзін з супрацоўнікаў калоніі фактычна адмовіўся сведчыць супраць Паліны, проста зачытаў невыразна нейкі падрыхтаваны загадзя тэкст (…) Паліна ў адказ заявіла, што на яе за апошні час аказваўся моцны псіхалагічны і фізічны ціск. Амаль увесь гэты год яна правяла ў жахлівых умовах штрафнога ізалятару.
Паліна засведчыла, што ў чэрвені гэтага года была моцна збіта іншымі зняволенымі, і лічыць, што гэта было зроблена па загаду адміністрацыі калоніі. Сёння павінны былі пачацца спрэчкі бакоў, і пракурор павінен быў запрасіць для Паліны тэрмін зняволення. Але нечакана пракурор, папрасіў час, каб падрыхтавацца да спрэчак бакоў. І суддзя зрабіў перапынак. Суд адновіцца толькі 9 кастрычніка а 10-й гадзіне.
Увесь гэты тыдзень Паліна застанецца ў ІЧУ г. Рэчыцы. Паліна зрабіла заяву, што ўтрымліваецца ў ІЧУ ў нечалавечых умовах. Ёй не выдалі ні матрац, ні іншыя прыналежнасці. А ўсе асабістыя рэчы і прадукты ў яе забралі. У ІЧУ Паліне прыходзіцца спаць на падлозе, бо спаць на металічных пласцінах, з якіх зроблены нары немагчыма…”
Грамадская дзяячка з Брэста Паліна Шарэнда-Панасюк Была брутальна затрыманая 3 студзеня 2021. Ёй выставілі абвінавачванні паводле артыкул 364 Крымінальнага кодэксу (Гвалт у дачыненні да супрацоўніка міліцыі) за тое, што нанесла драпіну аднаму з міліцыянтаў, якія прыйшлі да яе дамоў. Пазней стала вядома, што жанчыну таксама вінавацяць у абразе Аляксандра Лукашэнкі (арт. 368 КК) і прадстаўніка ўлады (арт. 369 КК). За гэтыя артыкулы Паліну асудзілі на 3 гады. Падчас зняволення жанчыну некалькі разоў змяшчалі ў карцар, яна скардзілася на псіхалагічны і фізічны ціск.
6 жніўня 2023 года Паліна Шарэнда-Панасюк павінна была выйсці на волю, але супраць яе адкрылі новы крымінальны артыкул за непадпарадкаванне патрабаванням адміністрацыі калоніі.