Беларуская неглюбская тэкстыльная прамысловасць у Гомельскай вобласці і беларускае мастацтва выцінанкі вылучаныя сёлета на ўнясенне ў спіс нематэрыяльнай культурнай спадчыны ЮНЕСКА. Выцінанка пастаўлена ў план разгляду намінацый на 2024 год.
Пра гэты распавёў кансультант аддзела аховы і ўліку гісторыка-культурных каштоўнасцей Міністэрства культуры РБ Генадзь Ходар падчас прэс-канферэнцыі ў Нацыянальным прэс-цэнтры. Ён зазначыў, што “прадстаўленне ў спісах ЮНЕСКА — гэта ацэнка міжнароднай супольнасцю беларускай спадчыны і культуры”.
Спіс, які вядзе міжнародная арганізацыя ЮНЕСКА, на сёння ўключае дзевяць беларускіх пазіцый: чатыры прадстаўляюць матэрыяльную спадчыну, а пяць – нематэрыяльную. Сярод апошніх у спіс ЮНЕСКА ў мінулым годзе было ўнесенае саломапляценне Беларусі.
А ў наступным годзе намініраваць на ўнясенне ў спіс ЮНЕСКА будуць культуру беларускай дуды. Паводле Генадзя Ходара, на сёння ў краіне каля 30 дудароў-прафесіяналаў і каля сотні аматараў.
Вёска Неглюбка ў Веткаўскім раёне Гомельскай вобласці славіцца сваімі традыцыямі ткацтва. Ручнікі мясцовых ткачых упрыгожваюць музеі і прыватныя калекцыі Еўропы і Азіі, экспанаваліся на выстаўках у розных краінах свету. Не менш унікальныя і неглюбскія шматкаляровыя посцілкі, набожнікі, фіранкі, а таксама неглюбскі строй.
Выцінанка — ажурны ўзор, выразаны з белай, чорнай ці каляровай паперы. У Беларусі ў XIX — першай палове XX стагоддзяў выцінанкі ўжываліся для афармлення жылля, стварэння інтэр’еру, цяпер выцінанку выкарыстоўваюць таксама для афармлення кніг, паштовак і так далей.
Фота: Веткаўскі музей і з адкрытых крыніц
