Мабыць, у горадзе настолькі не хапае дворнікаў, а за праведзеную працу і паказальную “дабраахвотную стваральную працу” выдаць справаздачу ёсць такая вострая неабходнасць, што зараз па чацвяргах гомельцаў, незалежна ад адукацыі і ступені нагрузкі на асноўным месцы працы, літаральна прымушаюць выходзіць на вуліцу з венікамі і граблямі.
Ілюстрацыйнае фота
“Дайшло да таго, што на працы літаральна пагражаюць, – з прыкрасцю дзеліцца ўражаннямі працаўніца «Гомельводаканала», якая вырашыла не называць сваё імя. – Прытым пагражаюць на нарадах прамым тэкстам. Даюць зразумець, што працы ў горадзе мала, і калі нешта не падабаецца, – да пабачэння. Дайшло да таго, што калегі нават паміж сабой гэта ўжо не абмяркоўваюць – усе баяцца, што хтосьці кагосьці здасць і будуць наступствы. Людзі запалоханыя і жывуць у страху. Прытым выганяюць падмятаць дарожкі і высаджваць-фарбаваць клумбы нават супрацоўнікаў бухгалтэрыі, у якіх цяпер і так завал і справаздачнасці. І супрацоўнікаў, якія павінны вось прама зараз ехаць на выклікі і вырашаць рэальныя праблемы гаржан. І ўсё толькі для таго, каб даць справаздачу чыноўнікам і застацца на цёплым месцы”.
Для цікавасці «Штодзень» прачытаў свежыя навіны дзяржвыданняў. І сапраўды, матэрыялы пра той самы сеняшні “чысты чацвер” ужо напісаныя і хутка выстаўленыя.
І ўжо ёсць справаздача аб тым, што «на чысты чацвер выйшлі работнікі прадпрыемстваў “Гомельвадаканал” і “Чырвоная гваздзіка” з вось такім апісаннем: “Калектыўная праца на карысць горада, раёна аб’ядноўвае, гуртуе. У многіх прадпрыемстваў горада даволі шырокія тэрыторыі. Каб было чыста, трэба прыкладаць намаганні ўсім. А яшчэ разам весела працаваць. За жартамі, смехам і не заўважаеш, як мяняецца ўсё вакол”.
