«У выніку візіту мы заключылі кантракт на будаўніцтва малочна-таварнай фермы на 600 галоваў», – сказаў дырэктар інстытута ААТ «Гомельаграпрампраект» Вадзім Чэкан у эфіры рэгіянальнага тэлеканала.
Дадаткова гамяльчане бяруцца будаваць два кароўнікі, цялятнікі і ўсю неабходную інфраструктуру.
Прадпрыемства, якое зоймецца рэалізацыяй праекту, ён не называў, але ўлічваючы, што ззаду бачны фасад і шыльда «Гомельагракамплекту», размова, найхутчэй ідзе пра яго. Яшчэ ў 2020 годзе прадпрыемства было на мяжы банкруцтва. У тым жа годзе да яго далучылі яшчэ адно таварыства з катастрафічнай эканамічнай сітуацыяй ААТ «Насенне траваў». Прадпрыемства па стане на пачатак года было прыбытковым, змагло нават выплаціць дывідэнды. Што праўда, за 2022 год і будзе аплачваць абавязальніцтвы да канца гэтага.
Таксама манголы праяўляюць цікаўнасць да мяса-малочнай прадукцыі вытворчасці нашай краіны, сцвярджае супрацоўніца рэгіянальнага тэлеканала. «Наша краіна гатова прапанаваць сухое малако і мясную прадукцыю, навучанне супрацоўнікаў сельскай гаспадаркі», – дадае яна.
Што праўда, планы па экспарце ў Манголію мяса выглядаюць утапічна. На 2021 год увесь Еўразійскі саюз у асноўным экспартаваў туды нафтапрадукты, пшаніцу, грузавыя вагоны і шакаладкі (улічваючы, што Беларусь большасць сваёй статыстыкі засакрэціла, каб не трапляць пад санкцыі). Акрамя таго, гэта сельскагаспадарчая дзяржава, адна з вядучых у свеце па колькасці жывёлаў на жыхара краіны.
Пры гэтым, цікаўнасць да беларускага сухога малака, па звестках амбасады Беларусі ў Манголіі, не з’яўляецца нечым новым. Таму пра планы можна казаць колькі заўгодна. Варта ўлічыць, што інфармацыі пра поспехі ў гэтым напрамку няма.
Пастаўкі з нашай краіны ў Манголію ў 2021 годзе склалі 43 млн 540 тысячаў даляраў, паказаўшы падзенне па ўзроўню з 2020 годам. Больш новых паказчыкаў няма.
Прапаганда адсправаздачылася пра выключныя, доўгатэрміновыя і прарыўныя вынікі паездкі Аляксандра Лукашэнкі ў Манголію. Але насамрэч, кожную такую заяву варта разбіраць пад мікраскопам. І такі разбор паказвае, што паездкі звычайна збольшага асабісты піяр кіраўніка рэжыму, якія слаба адлюстроўваюцца на эканамічных паказчыках Беларусі.