Да Каляд яшчэ больш за месяц, аднак ужо з’явіліся афішы, што чакае гомельцаў на зімовыя святы. “Штодзень” прааналізаваў запланаваныя навагоднія мерапрыемствы.
Гомельскі дзяржаўны тэатр лялек збіраецца праводзіць навагоднія ранішнікі з 16 па 30 снежня і з 2 па 7 студзеня. Мова прадстаўленняў – руская. Героі – савецкія Чабурашка, Дзед Мароз і Снягурачка. Таксама ў пачатку снежня можна паглядзець “Снежную каралеву”, таксама па-руску. А калісьці тэатр лялек паказваў беларускамоўны калядны спектакль.
У Гомельскім абласным драмтэатры пад навагодняе прадстаўленне перарабілі ненавагодную казку Андэрсана “Цалёвачка”. У межах прадстаўлення драмтэатр абяцае ялінку, фотазону і калядныя сувеніры. Пра беларускіх герояў гаворка не вядзецца.
Гомельскі гарадскі цэнтр культуры збіраецца паказаць дзецям ажно некалькіх навагодніх прадстаўленняў. Ніводнае з іх не плануецца па-беларуску. Сярод герояў — савецкі Чабурашка, Дзед Мароз, кракадзіл Гена, кот Леапольд.
Адна з афіш ГЦК у Гомелі. У большасці навагодніх прадстаўленняў героі — дагэтуль савецкія.
Гасцінічна-забаўляльны комплекс “Ранча” прапаноўвае школам замаўляць у іх наведванне прадстаўлення “Дзед Мароз і машына часу”. І таксама па-руску. Сярод герояў — трансформеры, эльф, абарыген і савецкія Дзед Мароз са Снягурачкай.
Разгром грамадскага сектара, прадстаўнікі якога ладзілі хаця б камерныя калядныя мерапрыемствы, некалькі год запар пакідае гомельскіх дзяцей без беларускамоўных прадстаўленняў.
Беларускамоўная калядная ялінка ў Гомелі, 2015 г.
