Знакаміты беларускі паэт Анатоль Сыс нарадзіўся 26 кастрычніка 1959 году ў вёсцы Гарошкаў Рэчыцкага раёну. Свята паэзіі ў ягоны гонар не праводзіцца ўжо фактычна пяць год.
Паэт Анатоль Сыс ў майстэрні мастака Алеся Сушы. 1990-ыя гады, Мінск. Фота: Уладзімір Сапагоў, vytoki.net
Свой першы верш па-беларуску ён напісаў падчас навучання ў школе з рускай мовай навучання. У 1974 годзе дэбютныя творы Сыса былі надрукаваныя ў рэчыцкай раённай газеце «Дняпровец».
Першая падборка вершаў Сыса была ў 1986 годзе надрукаваная ў часопісе «Маладосць». Пры жыцці паэта выйшлі тры зборнікі ягоных вершаў.
Напачатку 1990-х гадоў Кася Камоцкая запісала некалькі песень на вершы Анатоля Сыса, сярод якіх «Мая белая лебедзь», «Ластаўка», «Залатыя краты».
Пасля смерці Анатоля Сыса штогод – спачатку ў кастрычніку, пасля ў траўні – на ягонай радзіме ў Гарошкаве ладзілася свята паэзіі ў ягоны гонар, але з 2019 года традыцыя перарвалася.
Апошні раз на сёння свята паэзіі ў гонар Сыса прайшло ў Гарошкаве ў лістападзе ў 2019 годзе на 60-годдзе паэта.
Спачатку арганізацыі свята перашкодзіла пандэмія, а потым рэпрэсіі, у выніку якіх многія творцы вымушаныя былі з’ехаць з краіны. Таксама ў 2021 годзе быў ліквідаваны Саюз беларускіх пісьменнікаў, сябры якога прыязджалі на мерапрыемства ў Гарошкаў і выступалі падчас свята паэзіі.
