Рок-музыкант з Гомеля Уладзіслаў «Нож» Наважылаў, якога ўлады ўнеслі ў спіс «тэрарыстаў», у сваім відэаблогу падзяліўся кадрамі і ўспамінамі ўцёкаў з Беларусі. Пасля палітычнага прысуду, які пакараў яго «хіміяй», ён жыве цяпер у Літве. Наважылаў прыгадаў, што яны з іншым музыкам Аляксандрам Памідоравым адбылі «суткі».
«Турма – гэта турма, ты проста ў чатырох сценах, цябе ізалявалі ад астатняга сусвету, ты не ведаеш, што дзеецца, і падпарадкоўваешся камандам тых дурняў, якія там ходзяць у форме, – прыгадаў музыка. – Але ж «хімія»… там ёсць ілюзія свабоды. Ты ходзіш і, падаецца, можаш паводзіць сябе як на свабодзе, але на гэтым цябе і зловяць». Ён упэўнены, што ён гэтую б «хімію» не вытрымаў і згадвае самагубства палітвязня Змітра Дудойця.
«Да таго, як я дабраўся да Украіны, шмат цікавага было», – кажа Наважылаў.
Сярод гэтага адзначае «фарсіраванне» ракі на гумовай лодцы, Бранск, пераход расійска-украінскай мяжы.
«Не тое, каб страшна было… гэта, напэўна, самы круты атракцыён, які я за ўсё жыццё бачыў наогул», – сказаў музыка.
Паводле Наважылава, ён апынуўся з дапамогай BYSOL у Літве і адчуваў тады сябе «вольна і досыць камфортна».
«Зараз сітуацыя дзіўная. Я, наогул, стаў «тэрарыстам» і нікуды ехаць не магу… Усё, што мы хочам, гэта хочам жыць. Што будзе далей, ніхто не ведае. Але спадзявацца пакуль што можна», – закончыў фільм Уладзіслаў Наважылаў.