Пра тое, што ў бліжэйшы час гомельская міліцыя будзе асабліва сачыць за сабачнікамі і іх культурай выгулу гадаванцаў, паведаміў намеснік начальніка аддзялення прафілактыкі УАПП УУС Гомельскага аблвыканкама Андрэй Бондараў. Ён падкрэсліў, што штраф для ўладальнікаў сабак, якія не прыбіраюць на вуліцы за гадаванцамі, складае ад 1 да 15 базавых велічынь (ад 37 да 555 рублёў – Рэд).
Ілюстрацыйнае фота
“Сума залежыць у тым ліку ад таго, першае гэта ці паўторнае правапарушэнне. Адказнасць наступае з 16-гадовага ўзросту, а калі сабаку выгульваў дзіцёнак, якому меней за 16 гадоў, то пратакол складуць на аднаго з яго бацькоў”, – растлумачыў Бондараў.
Таксама ён прапанаваў усім гомельцам тэлефанаваць у АУС, ЖЭС, ЖКГ ці санэпідстанцыю, калі тыя заўважаць, што нехта не прыбраў за гадаванцам.
“За чатыры месяцы 2023-га за такое парушэнне да адміністрацыйнай адказнасці было прыцягнута 37 уладальнікаў сабак – гэта ў два разы меней за аналагічны перыяд мінулага года”, – прывёў статыстыку па Гомелі Бондараў.
