Пакуль у раёнах Гомеля існуюць розныя па працягласці ўчасткі для руху веласіпедыстаў, хоць і аформленыя па ўсіх правілах – усяго 25 км. Гэта веладарожкі на Рэчыцкім праспекце, праспекце Касманаўтаў, на вуліцы Мазурава, участак вуліцы Чангарскай дывізіі да тралейбуснага парку на Савецкай.
“Каб іх аб’яднаць, задумалі глабальны праект, – паведаміў начальнік аддзела спорту і турызму Гомельскага гарвыканкама Ігар Палуян. – Гэтую задачу вырашае ўпраўленне архітэктуры Гомельскага гарвыканкама сумесна з ДАІ”.
У выніку на карце Гомеля будзе створана “павуцінка” веладарожак, якая стане даступная ўсім жадаючым. Па ёй будзе магчыма пракласці бяспечны маршрут велавандроўкі ў любую кропку Гомеля, не ствараючы перашкод пешаходам або аўтамабілістам. Скарыстацца картай змогуць і ўладальнікі электрасамакатаў, і пешаходы. Для гэтага спатрэбіцца месцамі панізіць бардзюры, нанесці разметку, каб сетка была паўнавартаснай.
Паводле звестак спецыяліста, плануецца падоўжыць веласіпедную дарожку на праспекце Рэчыцкім у Савецкім раёне да прыпынку “Сонечная”.
Ад ГД «Рэчыцкі» суцэльная веладарожка дасць магчымасць даехаць да “Сонечнай” і далей злучыцца з дарожкай уздоўж загараднай трасы. Участкі на вуліцах Барыса Царыкава, 8-й Іншагародняй, Уладзімірава і Хваёвай уключаны ў план бягучага рамонту вулічна-дарожнай сеткі на 2024 год. Там прадугледжана пашырэнне існуючых тратуараў, рамонт асфальтабетоннага пакрыцця, паніжэнне бардзюраў, нанясенне дарожнай разметкі.
