Пра гэта мастакі Яўгенія і Яўген Кот паведамілі на старонцы belarusian.bestiary у Інстаграме: “Па не залежачых ад нас прычынах выстава Беларускага бестыярыя закрыта. Экскурсій больш не будзе.”
Адкрыццё выставы адбылася 11 сакавіка ў галерэі “Мастацтва”. Пра гэта нават напісала дзяржаўная газета “Звязда”. Аднак ужо праз два дні выставу закрылі. Здарылася гэта пасля таго, як прарасейская прапагандыстка Святлана Жыгімонт напісала ў сябе ў тэлеграм-канале ажно два пасты з гэтай нагоды: “Чудесные выставки проходят в Палаце в Великий пост” і “Ну ничего, будет вам, окаянные, ответственные за воспитание народа, бестиарий. Будет! ”
Яўгенія і Яўген Кот больш за 20 гадоў таму стварылі сайт bestiary.us, дзе збіралася інфармацыя пра міфічных істотаў усіх краін. Як прызнаваўся сам Яўген Кот, некалькі гадоў таму з’явілася цікавасць і да беларускай міфалогіі.
Каляндар, створаны Яўгенам Катом. Ілюстрацыя: https://www.instagram.com/belarusian.bestiary/
Мастак у адным з інтэрв’ю аднаму незалежнаму выданню адзначаў:
“Звычайна беларусы вельмі мала ведаюць пра істоты, унікальныя менавіта для беларускай міфалогіі. Калі мы кажам пра агульнаславянскіх — дамавік, Баба-Яга, балотнік — яны вядомыя з дзяцінства, бо так склалася, што часцей мы ведаем лепей рускія казкі, чым беларускія. А вось калі казаць пра ўнікальных беларускіх істот — калі пра іх не ведаюць за межам краіны, то і ўнутры звычайна такая ж сітуацыя”.
Менавіта дзякуючы Яўгену папулярызуюцца беларускія міфічныя істоты, пра якіх пісаў, напрыклад Баршчэўскі.