Рэгістраваць хатніх гадаванцаў цяпер трэба не праз ЖЭУ, а праз “Адно акно”
Пры гэтым сам парадак рэгістрацыі хатніх жывёлаў не змяніўся
Пра гэта распавёў начальнік аддзела жыллёва-камунальнай гаспадаркі Гомельскага гарвыканкама Павел Млынарчык. Гаворка ідзе пра ўказ № 311 ад 6 верасня 2022 года, які ўступіў у сілу гэтай вясной.
Як цяпер будзе праходзіць працэс рэгістрацыі гадаванцаў: разам з заявай у “Адно акно” неабходна падаць дакумент, які можа пацвердзіць асобу чалавека. Прыводзіць ці прыносіць на рэгістрацыю самога гадаванца не трэба. Пасля завяршэння працэдуры гаспадар атрымае адпаведнае пасведчанне і жэтон (як адзначыў чыноўнік, іх ужо замовілі, і хутка яны ўжо будуць гатовыя), які трэба прымацаваць на ашыйнік гадаванца. Акрамя таго, трэба будзе азнаёміцца з правіламі ўтрымання жывёлаў, санітарнымі і ветэрынарнымі патрабаваннямі і распісацца. Далей дадзеныя пра хатнюю жывёлу, зарэгістраваную ў кватэры, перададуць у разлікова-даведачны цэнтр для налічэння падатку за валоданне тымі ж сабакамі і ў ЖЭУ. А супрацоўнікі жыллёва-эксплуатацыйных упраўленняў, у сваю чаргу, будуць сачыць за выкананнем патрабаванняў утрымання хвастатых у шматкватэрных дамах. Калі жывёла знікла або памерла, таксама трэба звярнуцца ў адміністрацыю раёна, паведаміўшы адпаведныя звесткі. Сабакі і коткі падлягаюць рэгістрацыі на працягу трох дзён з дня набыцця, шчанюкі і кацяняты – ва ўзросце ад 3 да 3,5 месяцаў. Аднак, калі сабака адносіцца да патэнцыйна небяспечных парод, то яго зарэгіструюць толькі пры наяўнасці ва ўладальніка даведкі аб праходжанні навучання ў “Спецкамунтранс”. У кватэры можна завесці не больш за дзве жывёлы. Але калі разам жывуць некалькі ўласнікаў або наймальнікаў, то не больш за аднаго гадаванца на сям’ю пры згодзе ўсіх паўнагадовых.