У Гомельскай вобласці сфарміраваны атрады народнага апалчэння. Па словах намесніка міністра ўнутраных спраў Беларусі – камандуючага ўнутранымі войскамі Беларусі Мікалая Карпянкова, атрады прайшлі падрыхтоўку пры дапамозе байцоў унутраных войск і змогуць у разе патрэбы са зброяй у руках абараніць не толькі сябе і свае дамы, але і Айчыну. Ці вучылі апалчэнцаў, як абараняцца ад рэальнай пагрозы – расійскіх дронаў, што ляцяць праз гомельскую вобласць ва Украіну і ствараюць небяспеку мясцовым – чыноўнік не ўдакладніў.
На нарадзе калегіі УУС у Гомелі М. Карпянкоў распавёў, што ў памежных раёнах Гомельшчыны праведзена праца з мужчынамі, што не падлягаюць прызыву, ці старэйшымі за 50 год. Сфарміраваныя з іх атрады народнага апалчэння дапамагаюць прыкрываць важныя аб’екты, населеныя пункты, выстаўляць блок-пасты.
М. Карпянкоў на нарадзе ў Гомелі. Фота: belta.by
Па словах зам. міністра, як піша БелТА, стварэнне атрадаў народнага апалчэння прывяло да нечаканага выніку: узровень злачыннасці з рэгіёне знізіўся на 60%.
Вынік настолькі нечаканы, што ў Сярэднявеччы гэты факт мог бы стаць падставай для кананізацыі апалчэнцаў (у тыя часы царкве не было патрэбы мець дакументальныя пацвярджэнні, навуковыя доказы ці хаця б статыстычныя дадзеныя – як зараз дзяржаўным СМІ і чыноўнікам). Хочацца спадзявацца, што такім жа цудадзейным стане ахова ад расійскіх дронаў узброеных аўтаматамі Калашнікава апалчэнцаў. Бо іначай як на цуд спадзявацца няма на што.