17 верасня ў нарвежскім Осла ўручылі ўзнагароды Free Media Awards за 2024 год. Адной з лаўрэатак стала журналістка Ларыса Шчыракова, якая асуджаная на 3,5 года турэмнага зняволення. Узнагароду за медыйшчыцу атрымаў праваабаронца Леанід Судаленка, паведамляе сайт “Беларускай Асацыяцыі Журналістаў”.
Фота: сайт БАЖ
Леанід Судаленка, які сам адбыў трохгадовае турэмнае зняволенне праз сваю праваабарончую дзейнасць, выступіў з прамовай:
– Сёння ідзе 651‑ы дзень зняволення Ларысы ў беларускай турме для жанчын у Гомелі, умовы ў якой можна параўнаць з бесчалавечным абыходжаннем і нават катаваннем. Там стрэс і пастаяннае агрэсіўнае асяроддзе павольна адымаюць здароўе кожнага. Асабліва ў штрафных ізалятарах, дзе палітычных катуюць холадам, дзе адбіраюць споднюю бялізну, не даюць матрацы і пасцельную бялізну, дзе дрэннае харчаванне, недахоп вітамінаў і шпацыраў на свежым паветры. Дзе палітычных месяцамі і нават гадамі трымаюць у адзіночных камерах без сувязі са знешнім светам, дзе поўная адсутнасць медыцынскай дыягностыкі здароўя, дзе няма сувязі са знешнім светам. А ў перапынках паміж ізалятарамі палітычных сілком адпраўляюць на брудную і шкодную працу ў халодныя прамысловыя цэхі. Улічваючы вялікую працягласць гэтых выпрабаванняў, нямногія выжывуць без шкоды для свайго здароўя…
Экс-журналістка Ларыса Шчыракова была асуджаная на 3,5 гады турэмнага зняволення. Цяпер яна знаходзіцца ў гомельскай калоніі і працуе там швачкай. Ларысу Шчыракову прызналі вінаватай паводле трох артыкулаў: садзейнічанне экстрэмісцкай дзейнасці (арт. 361-4 ч. 1, арт. 361-4 ч. 2 КК РБ) і дыскрэдытацыя Беларусі (арт. 369-1 КК РБ).
Узнагарода Free Media Awards за 2024 год уручаныя журналістам і СМІ з Беларусі, Грузіі, Украіны, Азербайджана, Расіі і Венгрыі.
Пачытаць пра журналістку можна ў артыкуле “Пяць фактаў пра Ларысу Шчыракову.
