Кніга гомельскага журналіста Анатоля Гатоўчыца “Адысея капітана БНР” прызнаная экстрэмісцкай. Такое рашэнне прыняў “суд” Добрушскага раёна.
Кніга “Адысея капітана БНР” прысвечаная Цімоху Акімавічу Вострыкаву — беларускаму падпольшчыку, які імкнуўся арганізаваць антысавецкую партызанку пасля ІІ Сусветнай вайны. Пасля трапляння ў палон да супрацоўнікаў савецкіх органаў ён амаль чвэрць стагоддзя правёў у сталінскіх і савецкіх лагерах. Аповесць падрыхтавана на аснове ўспамінаў Цімоха Вострыкава “Мая споведзь”, выдадзеных у “Запісах БІНіМ”, кнігі Янкі Запрудніка “Дванаццатка”, даследавання Антона Рудака “Беларусы на службе ЦРу. AEQUOR: група Вострыкава”, прыжыццёвых інтэрв’ю галоўнага героя незалежным СМІ.
Анатоль Гатоўчыц — заслужаны беларускі журналіст, які працаваў у шматлікіх незалежных выданнях, стаяў ля вытокаў “Беларускай Асацыяцыі Журналістаў”. За сваю дзейнасць Анатоль Гатоўчыц неаднаразова пераследаваўся ўладамі, а ў яго дома праводзіліся ператрусы.