Новая беларуская паслуга: крок наперад у развіцці турызму ці прыгожая забаўка, якой у рэчаіснасці няшмат хто зможа скарыстацца? Распавядаем, як можна атрымаць электронную беларускую візу.
З сакавіка 2025 года ў Беларусі запрацавала сістэма электронных віз для замежнікаў. Каб наведаць Беларусь, патэнцыйным турыстам не трэба звяртацца ў консульства, пытанне можна вырашаць анлайн праз сайт «Е-паслуга».
Тэарэтычна электронную візу могуць атрымаць жыхары 67 краін. Але на дадзены момант (да канца 2025 года) для 38 краін з гэтага спісу дзейнічае бязвізавы рэжым.
Спіс краін, жыхары якіх могуць атрымаць электронную візу для наведвання Беларусі
Замовіць беларускую візу можна праз сайт e-pasluga.by. Калі, канешне, замежнік ведае як карыстацца vpn, б з тэрыторыі значнай часткі краін зайсці на сайт будзе немагчыма.
Рэгістрацыя на партале магчымая па нумару тэлефона, email ці ўліковым запісе Google /Apple.
Кошт візы складаецца з дзвюх частак. Сэрвісны збор €6 і візавы збор – ад €0 до €60. Аднак адразу на сайце маецца заўвага: «Звяртаем увагу! У цяперашні час сістэмай электронных плацяжоў Assist заблакіравана аплата паслугі з выкарыстаннем плацежных карт, эмітаваных банкамі ЗША і Канады. Прыносім прабачэнні за часовыя нязручнасці”. Цалкам магчыма, што праблемы з аплатай узнікнуць і ў іншых выпадках. Што цікава, аплата прадугледжана не толькі картамі VISA (усіх відаў) і MasterCard, але і БелКард (спадзяёмся, жыхары Антыгуа і Барбуда ды Сэйшэльскіх выспаў даўно аформілі сабе менавіта такі плацежны сродак).
Заяўку разгледзяць за 7 каляндарных дзён. Электронная віза дасылаецца pdf-файлам. Дакумент неабходна раздрукаваць і мець пры сабе падчас знаходжання ў Беларусі (зусім без папер абысціся не атрымаецца). Наведаць краіну па візе можна толькі адзін раз, тэрмін знаходжання ў краіне – да 30 дзён. Што няблага: калі захраснуць у чарзе на мяжы на некалькі сутак, застанецца дастаткова часу, каб пападарожнічаць.
На жаль, на сайце няма карысных спасылак, якія дапамаглі б турысту забраніраваць жыллё, бо сэрвісы Booking і Airbnb такой магчымасці не даюць.