Дзмітрый Гарэлік кіраваў тэатрам з 1992 года і, відавочна, быў звольнены пасля суда за «распаўсюд экстрэмісцкіх матэрыялаў». Цяпер сярод кіраўніцтва дырэктара няма, нават выконваючага абавязкі не прызначылі.
Дзмітрый Гарэлік. Фота: Сетка публічных бібліятэк
Па звестках «Гомельскай Вясны», адміністрацыйную справу Гарэліка паводле ч. 2 арт. 19.11 КаАП РБ (распаўсюд экстрэмісцкіх матэрыялаў) разглядала ў судзе Чыгуначнага раёна Гомеля суддзя Сакалова Ганна ў студзені. І тады ён усё яшчэ быў пазначаны дырэктарам.
Стала вядома пра звальненне толькі ў жніўні, і, падобна што, як мінімум з таго жніўня пасада вакантная. Прыбралі Дзмітрыя Гарэліка і са старонкі з гісторыяй установы, хоць, відавочна, што менавіта пры ім адбыліся важныя падзеі, у прыватнасці, тэатр атрымаў сцэну.
У даўнім, яшчэ 2013 года інтэрв’ю «Вячэрняму Гомелю» Гарэлік так выказваўся пра спектаклі на беларускай мове: «Чаму мы павінны баяцца размаўляць з дзецьмі на іх роднай мове? Часам кажуць, што Гомель – рускамоўны горад. Але мне абсалютна перашкаджае, калі прыгожа гавораць на беларускай мове. Калі гэта смачна – гэта смачна. На якой бы мове не гаварылася, усё залежыць ад таго, як гэта падаецца, як гэта выконваецца, ці ёсць пачуццё густу ў людзей, якія ставяць на сцэне спектакль, наколькі гэта стыльна ў адносінах да драматурга ці да аўтара твора. Можна сыграць і без слоў, і гэта будзе цікава».
Пасля ягонага звальнення адпаведна з кантактамі на сайце, на сёння ў лялечнага тэатра ёсць толькі два намесніка дырэктара і бухгалтар.
