Гомель — гэта не толькі горад над маляўнічым Сожам, але і ўнікальная музычная лабараторыя, дзе ў рытме джазу, металу, рэгі і фолку перапляліся эпохі, культуры і лёсы. У гэтым эпізодзе “Галасоў Гомельшчыны” мы сустракаемся з радыёвядоўцам і даследчыкам беларускай папулярнай музыкі Віктарам Сямашкам, каб прасачыць гісторыю музыкі Гомеля — ад кабарэ 1920-х да андэрграўнду 1970-х, ад пасляваенных шлягераў да блюзавых фестываляў і метал-сцэны 2000-х.
Віктар Сямашка. Фота: Вячаслаў Радыёнаў, ultra-music.com
Гомель не проста адлюстроўвае сусветныя тэндэнцыі — ён стварае свае хвалі. Тут пачыналі тыя, хто пасля станавіўся вядомымі далёка за межамі Беларусі. Праз постаці Арона Лебедзева, Эддзі Рознэра, Рыгора Пукста, рэпера Сярогі і гурта God’s Tower раскрываецца не толькі музычны патэнцыял рэгіёна, але і ягоны непаўтаральны шарм.
Запрашаем на падкаст “Гомельскі саўндтрэк: ад Уцёсава да God’s Tower “. Гісторыі, захаваныя для вас. Слухайце, каб адчуць рытм усходняй Беларусі.
Хто згадваецца ў падкасце?
Розныя ВІА 1960-1980-х гадоў. Сярод іх – ВІА “Синяя птица”, які ўтварыўся ў Гомелі ў 1972 годзе і які пазней праспяваў шлягер тых часоў “Там, дзе клён шуміць”.
Рок-гурт “Пры свечках” (“При свечах”). Рабілі арт-рокавыя адаптацыі Баха, Бетховена, Моцарта.
А таксама фолк-выканаўцы, сярод якіх “Стары Ольса”.