Грамадзяніна Украіны, прадпрымальніка Паўла Купрыенку прызналі вінаватым у агентурнай дзейнасці. Пра гэта паведамляецца на сайце Гомельскага абласнога суда.
У кастрычніку 2022 года на праўладным тэлеканале АНТ выйшаў сюжэт пра грамадзяніна Украіны, які нібыта прыехаў у Беларусь з заданнем ад вайсковай выведкі Украіны. Сярод якіх быў і маніторынг грамадска-палітычнай сітуацыі, збор дадзеных аб перамяшчэнні вайскоўцаў у Беларусі.
Суд над Паўлам Купрыенкам распачаўся 14 лютага і ўжо 9 сакавіка быў вынесены прысуд. Як адзначаецца на сайце Гомельскага абласнога суда, Павал Купрыенка прызнаны вінаватым у супрацы замежнага грамадзяніна з выведкай замежнай дзяржавы, што спалучалася здзяйсненнем дзеянняў, скіраваных на прычыненне шкоды нацыянальнай бяспецы Рэспублікі Беларусь. На падставе артыкула 358-1 КК грамадзянін Украіны пакараны 7 гадамі пазбаўлення волі ў папраўчай калоніі ва ўмовах узмоцненага рэжыму.