Украінскі музыка, сяржант ЗСУ Уладзімір Някрасаў, выдаў песню “Вуліца Жызнеўскага” на беларускай і ўкраінскай мовах. Праца над песняй пачыналася разам з асноўным складам гурта “Батьківський комітет”, але праз вайну была завершаная з пабрацімамі Уладзіміра па службе ў ЗСУ. Тэкст, засяроджаны на памяці, на абедзвюх мовах напісаў паэт Алесь Плотка, чатыры апошнія радкі, погляд у будучыню, дадаў сам Уладзімір.
Мемарыял загінулым беларускім абаронцам Украіны ў Кіеве. Фота: скрыншот з відэа “Вуліца Жызнеўскага”
Паводле Уладзіміра Някрасава, для яго гэта песня пра будучыню Беларусі і Украіны. “Я пэўны, што перамога Украіны ў гэтай вайне гэта вялікі камень у падмурак свабоды і незалежнасці дэмакратычнай Беларусі. Шчыра веру ў саюз краінаў Міжмор’я – Украіны, Беларусі, Польшчы і Літвы, лічу, што беларусы – самая блізкая украінцам нацыя па мове, культуры і барацьбе супраць маскоўскага панавання”, — падкрэслівае Уладзімір Някрасаў.
Даведка
Уладзімір Някрасаў – прафесійны музыка па адукацыі і па прафесіі. Бацька трох дзяцей, зараз служыць у ЗСУ у Асобнай Прэзідэнцкай брыгадзе імя Багдана Хмяльніцкага ў званні малодшага сержанта.
У відэашэрагу да песні выканаўцы размясцілі памятную дошку загінулым беларусам, якая знаходзіцца на вуліцы Беларускай у Кіеве. На бягучы момант яна завешаная тканінай праз контраверсійныя стасункі паміж нацыямі і зразумелае сацыяльнае напружанне.
Міхаіл Жызнеўскі – гамяльчук, герой Украіны, адна з першых ахвяраў Еўрамайдану.
