Дзікія хамякі (хамякі звычайныя, Cricetus cricetus) – вельмі рэдкія, дакладных звестак пра тое, што яны сёння жывуць ў Беларусі, няма, занесеныя ў «Чырвоную кнігу». Але пасля таго, як такога хамяка быццам бы бачылі ў Добрушскім раёне, былі арганізаваныя тры навуковыя выезды.
Ілюстрацыйнае фота
Даследнікі, звязаныя з кафедрай экалогіі ўніверсітэта імя Скарыны, паведамілі, што дзікага хамяка быццам бы бачылі каля аграгарадка Івакі на ўзараным полі яшчэ тры гады таму, паведамляе тэлеграм-канал De facto. Беларуская навука.
З таго часу, былі арганізаваныя тры палявых выезды (у 2024 і 2025 гадах). Даследчыкі шукалі грызуноў з дапамогай бінокляў, аглядалі норы, даследавалі траншэю.
На жаль, хамяка звычайнага пакуль так і не знайшлі. Наступны этап пошукаў: апытанне мясцовых жыхароў, збор і аналіз рэшткаў ежы соў. Даследчыкі дапускаюць, што звяркі жывуць на прысядзібных участках унутры самаго аграгарадка.
Што цікава, у 2019-2020 гадах спробу знайсці хамякоў у Беларусі зрабіла і «Ахова птушак Бацькаўшчыны», яны атрымалі на гэта фінансаванне ад Еўрасаюза і ААН і працавалі разам з чыноўнікамі з Мінпрыроды і аховы навакольнага асяроддзя.
«У Беларусі дакументальна зафіксавана пражыванне хамяка звычайнага толькі ў паўднёва-заходніх і паўднёва-ўсходніх раёнах. Магчыма, ён жыў і ў цэнтральных раёнах краіны. Але, на жаль, усе вядомыя раней месцы пражывання пры праверцы ў апошнія два гады аказаліся нежылымі, — паведаміў у 2019 годзе раёнцы Сямён Левы, спецыяліст АПБ па прыродаахоўных пытаннях. — Пакуль мы ведаем толькі адно дакладнае назіранне звычайнага хамяка ў 2019 у зусім новым месцы. Яшчэ ёсць 5–7 патэнцыйных месцаў, дзе хамяка адзначалі мясцовыя жыхары ў апошнія дзесяцігоддзі, і застаецца надзея, што ён там застаўся».
На думку спецыялістаў, за апошнія дзесяцігоддзі колькасць звычайнага хамяка скарацілася больш чым на 90 %. Калі нічога не зрабіць для яго аховы, верагодна, гэты рэліктавы від знікне ў Беларусі ўжо ў найбліжэйшы час, пісала ў 2019 годзе кобрынская раёнка.
У 2020 годзе «Бацькаўшчына» нават гатовая плаціць за знойдзенага хамяка 200 рублёў. Але пасля выбараў і пратэстаў улады прызналі арганізацыю экстрэмісцкім фармаваннем, і работа, як мы бачым была звернутая на чатыры гады.
Звычайныя хамякі — самыя буйныя прадстаўнікі падсямейства. Даўжыня цела ў дарослых самцоў — да 34 см, маса цела можа дасягаць і 1 кг. Афарбоўка – яркая і кантрасная: верх цела рудавата-буры, брушка чорнае. Хамякі жывуць паасобку, карміцца выходзяць ноччу. Таму заўважыць іх складана, але можна апазнаць па вельмі буйных норах, дыяметр уваходу 10 см, каля яго шмат зямлі. Зімой яны засынаюць.
