У праграме сёлетняга святкавання Дня горада Гомеля адчуваецца выразны расейскі прысмак. На першы погляд, усё выглядае пазітыўна: шмат сямейных і спартыўных падзей, вулічная ежа, дзіцячыя конкурсы, паркур, скульптуры з пяску і дрэва, канцэрты мясцовых ансамбляў. Гэта стварае ўражанне шырокага і адкрытага гарадскога фестывалю, дзе ёсць чым заняць і дзяцей, і моладзь, і старэйшае пакаленне.
Аднак ключавыя акцэнты ў свяце расстаўленыя так, што менавіта расейская культурная прысутнасць аказваецца дамінуючай. Так, хэдлайнерамі асноўнага канцэрта становяцца зоркі расейскай эстрады — Андрэй Дзяржавін, Сяргей Скачкоў, Сяргей Рагожын. Асобнае месца займае выступленне народнага артыста Расійскай Федэрацыі Васілія Герэлы, а 11 верасня ў горадзе даюць гала-канцэрт з удзелам прыхільніка вайны супраць Украіны Вячаслава Малежыка, якога прадстаўляюць як спецыяльнага госця. Нават масавы флэшмоб «Гітарны рэкорд» будуецца вакол песні з ягонага рэпертуару. У праграме таксама значнае месца займае казачы ансамбль “Батька Атаман”, які прадстаўляе расейскую ваенна-фальклорную традыцыю.
Мясцовыя выканаўцы і беларускія фарматы застаюцца хутчэй на ўзроўні дадатку: выступленні ансамбля “Аура”, групы “Дразды”, дзіцячы конкурс “Сожская зорачка”. Яны прысутнічаюць, але не фарміруюць галоўны вобраз свята. Тое ж можна сказаць і пра спартыўна-забаўляльныя мерапрыемствы — яны хутчэй фонавыя, ствараюць атмасферу, але не вызначаюць ідэалагічны каркас падзеі.
У выніку атрымліваецца свята з расейскім прысмакам: пад прыгожай абалонкай сямейнага фестывалю застаецца выразны пасыл — культурная ідэнтычнасць горада трактуецца праз расейскую і савецкую традыцыю, а беларускае застаецца ў ролі дадатковага дэкору.
